ახალგაზრდა მეცნიერთა კავშირმა „ინტელექტი“ ქედისა და შუახევის მუნიციპალიტეტებში კონკურსის „საკრებულოს საუკეთესო წევრი“ გამარჯვებულები - ვაჟა ბოლქვაძე და ფატი ჭაღალიძე დააჯილდოვა.

კონკურსი ჩატარდა პროექტის „თემები დემოკრატიული არჩევნებისათვის“ ფარგლებში, ხულოს, შუახევის, ქედის, ხელვაჩაურისა და ქობულეთის მუნიციპალიტეტების საკრებულოების მონიტორინგის საფუძველზე.

კონკურსი მიზნად ისახავს:

• საკრებულოს აქტიური წევრების მორალურ მხარდაჭერას;
• საკრებულოს წევრების  საქმიანობის სტიმულირებას და ეფექტურობის ამაღლების ხელშეწყობას;
• საკრებულოს წევრების პასუხისმგებლობის დონის ამაღლებას;
• საკრებულოს წევრების საქმიანობაზე მონიტორინგის პრაქტიკის დამკვიდრებას.

„ინტელექტი“ მუნიციპალიტეტების საკრებულოების მონიტორინგის დროს საკრებულოს წევრებს შემდეგი კრიტერიუმებით აფასებდა:

• კომისიის სხდომებზე დასწრება და აქტიურობა;
• საკრებულოს სხდომებზე დასწრება და აქტიურობა;
• მოხსენებები საკრებულოს სხდომებზე;
• საკითხების ინიცირება საკრებულოს სხდომებზე;
• ზემდგომ და სხვა ორგანოებში შუამდგომლობები;
• საკრებულოს წევრების რეკომენდაციები.

ქედისა და შუახევის მუნიციპალიტეტების „საკრებულოს საუკეთესო წევრებს“ - ვაჟა ბოლქვაძესა და ფატი ჭაღალიძეს სპეციალური დიპლომები და ფასიანი საჩუქრები გადაეცათ.

„ინტელექტი“ მორიგ საკრებულოს სხდომებზე „საკრებულოს საუკეთესო წევრებს“ დააჯილდოებს ხულოს, ხელვაჩაურისა და ქობულეთის მუნიციპალიტეტებში.

«««